Fimmtudagskvöldið 19 september í Tjarnarbíói á LÓKAL

Díó (Aðalbjörg Árnadóttir og Ylfa Áskelsdóttir):
Saga biðraða frá fullveldi til framtíðar.
Samtal um biðraðir, Íslendinga, græðgi og hvað það er að vera þjóð meðal þjóða.

Díó hefur áður fært okkur sýninguna: Þær spila blak hallelúja. Nú rannsaka þær sögu íslenskra biðraða.

Á barnum eftir verkið flytur Björg Elínar – Sveinbjörnsdóttir electrónískan söngleik í þremur þáttum upp úr júní útgáfu Rauðu seríunnar, Bráð fjallanna.

FRÍTT INN. ÖLL VERK Á FESTIVALINU ERU VERK Í VINNSLU.

FÖSTUDAGSKVÖLDIÐ 20 SEPTEMBER Á LÓKAL, Í TJARNARBÍÓI.

Íslenskt Snitsel –
Janus Bragi Jakobsson og Loji Höskuldsson

Gjörningafyrirlestur þar sem notast er við fundið efni, myndbönd sem aðrir Íslendingar hafa skapað og sett á netið.

Í mörgum fjölskyldum var til vídeókamera og á flestum heimilum var ljósmyndavél. Oft var einn karlmaður sem skrásetti viðburði í bæjarfélaginu, gjarnan skilmerkilega en tilgangurinn þó óljós, því fáir ef engir voru staðirnir til að sýna efnið.

Janus hefur safnað þessum fundnu gullmolum undanfarin ár og við undirleik Loja Höskuldsonar sýnt nokkur af þessum myndböndum á svokölluðum Snitsel-kvöldum.
Sett undir sama hatt verða skrásetningarnar mynd af íslensku þjóðarsálinni, hugmynd þjóðar um gildismat, sjálfsmynd, minningar og fagmennsku en þó umfram allt viljan til að tengjast öðrum. Myndböndin eru hugmyndir skrásetjarans um lífið, eins og hin eilífa skrásetning sé birtingarmynd einmannaleikans og hræðslunnar við að gleymast. Það sem eftir situr þegar horft er á þessar skrásetningar er hvað einmannaleikinn er sterk tilfinning sem miðlast án mikilla tilþrifa og tilkostnaðar. Einmannaleikinn er bestur nakinn, skýr og örvæntingafullur.

Eftir sjóvið leikur Árni Vilhjálmsson tónlist á barnum. Árni gaf nýverið út plötuna Slightly hungry. Hann mun leika lög af henni og mögulega nýta vettvanginn til að prufa nýtt efni.

Íslenskt Snitsel hefst kl. 20:00, og eftir það verður pása þar sem við hvetjum alla til að versla á barnum, svo stígur Árni á stokk.

FRÍTT ER INN. ÖLL VERK Á FESTIVALINU ERU VERK Í VINNSLU.

Sunnudagur 22 september á LÓKAL í Tjarnarbíó.

Dagurinn hefst á bröns í Tjarnarbíó. Kl. 12. Nánari upplýsingar um brönsinn síðar. Hvetjum alla til að mæta og snæða hádegisverð og fara svo í beinu framhaldi á Kveikjur.

Listamenn úr vinnustofu festivalsins Kveikjur sýna afrakstur kl. 14:00.

Listamenn í vinnustofunni Kveikjur eru:

Andrea Vilhjálmsdóttir með fræ út frá barnafötum af henni sjálfri sem lifað hafa einmanalegu lífi í geymslunni í 25 ár.

Ragnar Ísleifur Bragason með fræ út frá næturverði sem hlustar síendurtekið á lagið Tímabil með hljómsveitinni Í Svörtum Fötum.

Ragnheiður Harpa Leifsdóttir með fræ út frá aðdráttarafli leikhússins séð frá þeim sem vinna bak við leikhústjöldin.

Tatjana Dís með fræ út frá því óhöndlanlega og skrásetningu drauma.

Þau hafa unnið að fræjum sínum frá 14. september og fengið handleiðslu frá Eirúnu Sigurðardóttur, Guðrúnu Evu Mínervudóttur og Margréti Bjarnadóttur.

FRÍTT ER INN. ÖLL VERK Á FESTIVALINU ERU VERK Í VINNSLU.

Villi Neto og Stefán Ingvar gera upp æsku sína, menntun og uppeldi í nýrri uppistandssýningu.

Villi ólst upp í hitanum í Portúgal – heitu loftslagi og heitu félagslífi. Flutti síðan til Íslands 14 ára gamall í kuldann, kalt loft og fáa vini. Hann hefur verið í menningarsjokki síðan. Stefán Ingvar var skakkur frá því að hann var 16 ára þangað til að hann rankaði við sér 22 ára gamall, í sviðslistanámi, og dreif sig í meðferð. Síðan þá hefur hann reynt að vinna úr gremjunni sinni en það gengur ekkert vel.

Villi og Stefán hafa gert fullt af hlutum saman, enda hafa þeir verið bestu vinir í síðan í menntaskóla!. Þetta er í þriðja sinn sem þeir koma fram á uppistandskvöldi saman. Þeir hafa t.d. troðið tvisvar upp með uppistandshópnum Fyndnustu mínum á Hard Rock café fyrir troðfullum sal og öllum fannst ógeðslega gaman. Við gerum ráð fyrir því að það verði stappað aftur og ekkert minna skemmtilegt en síðast.

Drífið ykkur að panta miða inni á tix.is

Aðstandendur sýningar þakka Hringdu kærlega fyrir auðsýndan stuðning

Lífið  er stórskemmtilegt drullumall á mörkum leikhúss og myndlistar fyrir alla fjölskylduna.  Sýningin er unnin með óvenjulegri aðferð þar sem sagan í verkinu fær að kvikna út úr efniviðnum sem notaður er í sýningunni.  Lífið  fjallar um sköpunarkraft, vináttu og hringrás lífsins, þar sem unnið er með mold. 

Lífið hefur hlotið einróma lof áhorfenda og gagnrýnenda, jafnt á Íslandi sem erlendis.

Verkið hefur m.a. verið sýnt í Kína, Þýskalandi, Hollandi, Noregi og á Möltu og verða örfáar sýningar í Tjarnarbíói í haust.  

Lífið var valin besta barnasýningin ársins 2015 á Grímunni – Íslensku sviðslistaverðulaununum, auk þess sem leikhópurinn Tíu fingur var valinn Sproti ársins 2015. Sprotinn er veittur einstaklingi eða hópi sem þykir sýna einstakan frumleika og framúrskarandi nýbreytni í sköpun sinni í sviðslistum.  

„Það er allt fallegt við þessa sýningu. Allar stjörnurnar í húsinu!“  

G.S.E. – Djöflaeyjan 

„Lífið er yndisleg sýning!“  

S.B.H. – Morgunblaðið 

„Það verður seint fullþakkað að til eru listamenn sem bjóða yngri börnum leikhússupplifun sem er valkostur við hraðann, hávaðann og íburðinn í stóru barnasýningunum.“  

D.K. – Hugrás

Höfundar: Leikhópurinn Tíu Fingur Listrænir stjórnendur: Helga Arnalds og Charlotte Böving Leikarar: Sólveig Guðmundsdóttir, Sveinn Óskar Gunnarsson og Saga Sigurðardóttir Tónlist: Margrét Kristín Blöndal Ljósahönnun: Björn Bergsteinn Guðmundsson  

Tæknimenn: Arnþór Þórsteinsson og Hafliði Emil Barðason Styrktaraðilar: Mennta- og menningarmálaráðuneytið, Sviðslistasjóður, Starfslaunasjóður listamanna og Reykjavíkurborg