fbpx

Manndýr

Aude Busson, Sigríður Sunna Reynisdóttir og Björn Kristjánsson (Borko)

Frumsýnt vorið 2021
Þátttökusýning

 

Manndýr er þáttökusýning um hlutverk mannsins út frá sjónarhorni barna.
Í sýningunni er samband barna og fullorðinna skoðað og spurningunni um hlutverk þeirra innan heimsins velt upp.

  • Þegar maður hugsar út í það, þá er maður bara til af því að maður er til…
  • Eða til, til að gefa dýrunum?
  • Til… til að fjölga ormunum?
  • Eða erum við til fyrir heiminn?
  • En aftur á móti, þá endist jörðin ekki að eilífu, þannig að ef maður hugsar úti það, þá getur maður ekki bara haldið áfram að fæðast, fæðast og fæðast…

Af hverju er maðurinn til? Af hverju er barn til? Hvað gera þau og til hvers?
Hljóðmynd verksins er unnin upp úr vangaveltum barna út frá þessum spurningum. Sýningin er á mörkum þess að vera leikverk og innsetning. Í rýminu er manndýr í tilvistarkreppu að reyna að púsla sögu sinni saman á ný og skilja tilgang sinn í heiminum. Á milli leikrænna atriða eru börn jafnt sem fullorðnir hvattir til að taka þátt og leika saman.

Í Manndýr er gestum boðið inn í heim þar sem hægt er að upplifa með eyrum, augum og höndum, sjálf eða í samvinnu. Við gefum okkur tíma til að spyrja spurninga sem fá svör eru við og dvelja í heimi þar sem börn segja alla söguna.

 

Aude Busson er sviðslistarkona sem hefur áhuga á að skapa sýningar og viðburði sem byggja á þátttöku áhorfenda og þá sérstaklega með samvinnu barna og fullorðinna. Síðasta verk hennar “Ég elska Reykjavík” var fjölskyldugöngsýning og var tinefnd til Grímuverðlauna.

Sigríður Sunna Reynisdóttir er sviðshöfundur og hönnuður. Hún hefur unnið leikmyndir, búninga og leikbrúður fyrir fjölda sýninga í Þjóðleikhúsinu,
Borgarleikhúsinu, í Tjarnarbíó og víðar síðustu ár, auk þess að framleiða eigin sviðsverk.

Björn Kristjánsson eða Borko er tónlistarmaður og grunnskólakennari. Hann hefur unnið bæði í leikhúsi og í tónlistarheiminum í tæp 20 ár og leitt fjölda
tónlistarverkefna með börnum.

X