Framtíðarsýnin okkar er að vera…

• …meginvettvangur nýsköpunar í íslenskum sviðlistum.
• …leiðandi afl hérlendis í alþjóðlegu samstarfi í sviðslistum.
• …upplýsingamiðstöð um sviðslistir.

Okkar hlutverk

• Tjarnarbíó er heimili sjálfstæðra sviðslista og okkar hlutverk er að reka heimilið á ábyrgan hátt.
• Heildarhagsmunir íslenskra sjálfstæðra sviðslista og skapandi greina til framtíðar eru í fyrirrúmi.
• Við erum í samtali við íslenskt samfélag.
• Við þjónustum af heilindum áhorfendur og listamenn.
• Við hjálpum listamönnum að láta hugmyndir sínar verða að veruleika.
• Við stöndum fyrir því að hér sé umræða um sviðlistir á breiðum grunni.

Gildi

• Í Tjarnarbíói ríkir fullkomið jafnrétti. Við komum fram af virðingu hvert við annað.
• Við byrjum alla hugmyndavinnu á að spyrja, hvernig væri hugmyndin framkvæmd í fullkomnum heimi áður en við takmörkum okkur.
• Í Tjarnarbíói á öllum aðstandendum að líða eins og hagsmunir þeirra og Tjarnarbíós séu hinir einu og sömu.

Starfsreglur framkvæmdarstjóra og stjórnar MTB um það hvernig staðið skal að vali á verkefnum inn í Tjarnarbíó 

• Markmiðið með þessum reglum er að allir sitji við sama borð þegar kemur að umsóknum óháð tengslum, venslum eða völdum.
• Stjórn og framkvæmdarstjóri leggja við drengskap sinn að vinna heiðarlega og faglega, þannig að heildarhagsmunir sjálfstæðra sviðslista til framtíðar séu alltaf í fyrirrúmi.
• Ef að umsókn er á vegum stjórnarmanna eða framkvæmdarstjóra hafa þeir ekki ákvörunarvald en varamaður í stjórn MTB skal taka ákvörðun í þeirra stað. Eins ef stjórnarmaður eða framkvæmdarstjóri telja sig af öðrum sökum vanhæfa.
• Ef þannig vill til að fleiri en einn stjórnarmaður eiga þátt í umsókn eða telja sig vanhæfa skal næst leita til áheyrnarfulltrúa SL í stjórn MTB, þá næst tæknistjóra Tjarnarbíós, þá markaðs- og miðasölustjóra og að lokum sviðsstjóra MTB.
• Séu meirihluti stjórnar sammála um að innan okkar raða séum við ekki fær um að dæma verkefni á faglegum forsendum er sjálfsagt að skipa fjögurra manna nefnd til að meta umsókn.
• Minnst fjórir aðilar skulu meta hvert verkefni.    
• Framkvæmdarstjóri ber ábyrgð á því að kynna sér og leggja fyrir stjórn þau gögn sem þarf til að meta hverja umsókn viku fyrir fund.  
• Framkvæmdarstjóri hefur heimild til að setja sig í samband við listamenn og hópa sem hann telur að gætu sómt sér vel í Tjarnarbíói, en endanleg ákvörðun á vali er alltaf í höndum stjórnar samkvæmt þessum starfsreglum.
•  Framkvæmdarstjóri hefur frelsi til að skipa dagskrá utan aðalrýmis. Hann skal vinna eftir gildum og markmiðum Tjarnarbíós og fara eftir valferlisreglum.

Mat á umsóknum hópa og listamanna sem vilja setja upp verkefni í Tjarnarbíói

Þessar valferlisreglur eru hafðar til hliðsjónar hvort heldur um ræðir mat á umsóknum hópa sem sækja um sérsamning (4 vikur í æfingatíma á sviði frítt og hagstæð skipti á miðasölu) eða listamanna og hópa sem sækja um á öðrum forsendum (vika eða minna í æfingar, föst lágmarksupphæð per sýningu og skipting á miðasölu eftir það).

Verkefni fá einkunn á skalanum 1-10 fyrir hvert og eitt eftirtalinna atriða:

• 10%  – Er umsóknaraðili í SL? Já/nei (félagar í SL hafa forgang) Nei 0 stig já 10 stig.
• 5% – Hvert er nýnæmi verkefnisins í íslensku sviðslistaumhverfi?
• 10% – Er framkvæmdaráætlun verkefnisins skýr og raunhæf?
• 10% – Er verkefnið líklegt til að auka hróður Tjarnarbíós og sjálfstæða geirans?
• 5% – Má gera ráð fyrir því að verkefnið dragi að nýja áhorfendur?
• 10% – Hvernig passar verkefnið inn í efnisskrá Tjarnarbíós með tilliti til fjölbreytileika hennar í heild?
• 15% – Er kostnaðaráætlun verkefnisins raunhæf og inniheldur hún raunhæfa markaðs- og kynningaráætlun?
• 10% – Hafa forsvarsmenn verkefnisins bakgrunn, menntun og/eða reynslu sem ætti að verða til þess að raunhæft sé að ætla að þeir nái markmiðum sínum listrænt og fjárhagslega?
• 5% – Fá listamenn og aðrir sem að verkefninu standa greitt fyrir vinnu sína?
• 5% – Á verkefnið möguleika til markaðssóknar á erlendum vettvangi?
• 10% – Er verkefnið líklegt til að fá góða aðsókn?
• 5% – Á verkefnið erindi við samfélagið?

Mat á viðburðum sem leigja aðstöðuna á föstu verði

Gefum einkunn á skalanum 1-10 fyrir hvern eftirtalinn lið. Framkvæmdarstjóri, tæknistjóri og markaðs- og miðasölustjóri meta verkefnin (þau verða alltaf kynnt stjórnar til samþykktar).

• 30% – Er viðburðurinn líklegur til að auka hróður Tjarnarbíós?
• 10 % – Er viðburðurinn líklegur til að draga að sér hóp sem annars kæmi líklega ekki í Tjarnarbíó?
• 50% – Er viðburðurinn líklegur til að geta greitt umsamda leigu?
• 10 % – Er viðburðurinn með góða markaðs- og kynningaráætlun sem er fjármögnuð?